Cyllid wedi’i sicrhau.
Y cam nesaf nawr.

Shwmae bawb,

Ni wedi gwneud e. Mae WCVA wedi cymeradwyo’r cyllid i helpu ni brynu’r Workies.

Diolch am y gefnogaeth, yr amynedd a’r ffydd yn y cynllun. Mae’r tri mis diwethaf wedi bod yn waith caled iawn. Heb bobl yn dod ymlaen i roi’n fisol, rhannu’r stori a dweud eu bod nhw eisiau’r lle yn ôl, fydden ni ddim wedi cyrraedd fan hyn.

Mae’r benthyciad o £200,000 wedi’i gymeradwyo, a dw i wedi llofnodi’r papurau benthyciad. Mae’r pryniant dal i fynd drwy’r broses gyfreithiol. Felly, er bod hwn yn gam enfawr, nid yw’r adeilad wedi’i drosglwyddo i’r gymdeithas eto.

Beth sy’n digwydd nesaf?

Mae angen cwblhau’r gwaith cyfreithiol a gofynion y benthyciwr. Dyn ni hefyd yn gweithio drwy’r arolygon, yswiriant, diogelwch tân, trydan, trwyddedu a’r gwaith hanfodol i ailagor.

Mae ceisiadau a thrafodaethau am grantiau ar y gweill: Perthyn ar gyfer asesiadau a chyngor, y Gronfa Treftadaeth Bensaernïol ar gyfer gwaith cynllunio priodol, a’r Rhaglen Cyfleusterau Cymunedol ar gyfer camau datblygu pellach. Dyn ni hefyd yn paratoi cynnig ar gyfer toiledau hygyrch. Does dim un o’r grantiau hyn wedi’i gadarnhau fel dyfarniad yn y diweddariad hwn.

Mae dal angen eich help

Mae sicrhau’r benthyciad yn rhoi cyfle i ni. Nawr mae angen gwneud y mwyaf o’r cyfle hwnnw. Mae’r adeilad yn fawr, a bydd angen amser, arian a llawer o waith i’w gael fel mae’r gymuned eisiau.

Bydd rhagor i ddod am wirfoddoli, gweithgareddau a sut gall pobl helpu. Am nawr, daliwch ati i rannu a chefnogi os gallwch chi. Mae pob cyfraniad yn gwneud gwahaniaeth.

Bron iawn i ni golli’r lle. Peidiwn â chymryd y cyfle yma’n ganiataol.

Diolch o galon,
Scott